LENGUAJE Y EXPRESIONES

AUDICIÓN DEL TEXTO FRAGMENTO DEL DESTIERRO DE MÍO CID Mio Çid movió de Bivar pora Burgos adeliñado, assí dexa sus palaçios yermos e desheredados. De los sos ojos tan fuertemientre llorando, tornava la cabeça i estávalos catando. Vio puertas abiertas e uços sin cañados, alcándaras vázias sin pielles e sin mantos e sin falcones e sin adtores mudados. Sospiró mio Çid, ca mucho avie grandes cuidados. Fabló mio Çid bien e tan mesurado: "grado a tí, señor padre, que estás en alto! "esto me an buelto mis enemigos malos". Allí pienssan de aguijar, allí sueltan las riendas. A la exida de Bivar ovieron la corneja diestra, e entrando a Burgos oviéronla siniestra. Meçió mio Çid los ombros y engrameó la tiesta: "Albriçia, Álbar Fáñez, ca echados somos de tierra! "Mas a grand ondra tornaremos a Castiella". Mio Çid Roy Díaz por Burgos entróve, En sue compaña sessaenta pendones; exien lo veer mugieres e varones, burgeses e burgesas por las finiestras sone, plorando de los ojos, tanto avien el dolore. De las sus bocas todos dizían una razóne: "Dios, qué buen vassallo, si oviesse buen señore!" Conbidar le ien de grado, mas ninguno non osava: el rey don Alfonsso tanto avie la grand saña. Antes de la noche en Burgos dél entró su carta, con grand recabdo e fuertemientre seellada que a mio Çid Roy Díaz, que nadi nol diessen posada, e aquel que gela diesse sopiesse vera palabra que perdiere los averes e más los ojos de la cara, e aun demás los cuerpos e las almas. Grande duelo avien las yentes cristianas; ascóndense de mio Çid, cal non osan dezir nada. El Campeador adeliñó a su posada; así commo llegó a la puorta, fallóla bien çerrada, por miedo del rey Alfons, que assí lo pararan: que si no la quebrantás, que no gela abriessen por nada. Los de mio Çid a altas voces llaman, los de dentro non les quieren tornar palabra. Aguijó mio Çid, a la puerta se llegava, sacó el pie del estribera, una ferídal dava; non se abre la puerta, ca bien era çerrada. Una niña de nuef años a ojo se parava: "Ya Campeador, en buena çinxiestes espada! "El rey lo ha vedado, anoch dél entró su carta, "con grant recabdo e fuertemientre seellada. "Non vos osariemos abrir nin coger por nada; "si non, perderiemos los averes e las casas, "e aun demás los ojos de las caras. "Çid, en el nuestro mal vos non ganades nada; "mas el Criador vos vala con todas sus vertudes santas." Esto la niña dixo e tornós pora su casa. Ya lo vede el Çid que del rey non avie graçia. Partiós dela puerta, por Burgos aguijava, llegó a Santa María, luego descavalga; fincó los inojos, de coraçón rogava. La oraçión fecha, luego cavalgava; salió por la puerta e Arlançón passava. Cabo Burgos essa villa en la glera posava, fincava la tienda e luego descavalgava. Mio Çid Roy Díaz, el que en buena çinxo espada, posó en la glera quando nol coge nadi en casa; derredor dél una buena conpaña. Assí posó mio Çid commo si fosse en montaña. Vedada l′ an conpra dentro en Burgos la casa de todas cosas quantas son de vianda; nol osarien vender al menos dinarada.